آرمی چیف نے کهرا اور صاف اعلان کر دیا

...راولپنڈی

 آرمی چیف جنرل قمر جاوید باجوہ کی زیر صدارت منگل کو خصوصی
کور کمانڈرز کانفرنس ہوئی جس میں کہا گیا کہ افغانستان دھمکیوں اور الزامات کے بجائے اپنے اندرونی مسائل کی نشاندہی کرے۔آئی ایس پی آرکے مطابق کور کمانڈرز کانفرنس میں علاقائی سیکیورٹی کا جائزہ لیا گیا۔ افغانستان میں حالیہ دہشت گردی کے واقعات بھی زیر غور آئے۔ ترجمان کے مطابق کانفرنس میں افغان حکومت، عوام اور سیکیورٹی فورسز کے ساتھ اظہار یکجہتی کرتے ہوئے کہا گیا کہ شدت پسندی، دہشت گردی کا مقابلہ کرنے کے لئے افغانستان سے تعاون جاری رکھیں گے۔ کانفرنس کے شرکا نے افغانستان کی جانب سے بلاجواز الزامات، دھمکیوں کو سنجیدگی سے لیا اور کہا کہ دھماکوں کے بعد پاکستان کے خلاف الزامات اور دھمکیاں قبول نہیں۔ پاکستان پر الزامات کے بجائے افغانستان اپنے اندرونی مسائل کی نشاندہی کرے اور ان پر توجہ دے۔ ترجمان نے کہا کہ پاک فوج ہر قسم کے خطرات سے مادر وطن کا دفاع کرے گی اور خطے میں امن کے لئے اپنا کردار ادا کرتے رہیں گے ۔ دہشت گردی کے خلاف افغانستان سے تعاون وحمایت جاری رکھیں گے۔

(source: urdunews.com)