پاکستان: نانگا پربت کو سر کرنے کی کوشش کرنے والی فرانسیسی کوہ پیما کو بچا لیا گیا

پاکستان کے شمالی علاقے میں واقع 'قاتل پہاڑ ' کے نام سے معروف نانگا پربت پر پھنس جانے والی فرانسیسی خاتون کوہ پیما کو ایک ڈرامائی امدادی کارروائی کے نتیجے میں زندہ بچا لیا گیا ہے۔

تاہم اس ریسکیو آپریشن کے دوران ان کے پولینڈ سے تعلق رکھنے والے ساتھی کو تلاش نہیں کیا جا سکا۔

واضح رہے کہ کوہ پیما الزبتھ ریوول اور ٹوماس میکیوز جمعے کو نانگا پربت پر سات ہزار چار سو میٹر کی بلندی پر پھنس گئے تھے۔

اس بارے میں مزید پڑھیے

'وینیسا او برائن کے ٹو سر کرنے والی پہلی امریکی خاتون بن گئیں'

'کے ٹو سر کرنے کے لیے پہلی پاکستانی مہم'

یہ اطلاع ملنے پر پولینڈ سے تعلق رکھنے والی کوہ پیماؤں کی اس ٹیم کے چار ارکان جو اس وقت دنیا کا دوسرا بلند ترین پہاڑ کے ٹو سر کر رہی تھی اپنی مہم چھوڑ کر پاکستانی فوج کے ہیلی کاپٹر کی مدد سے نانگا پربت پر پہنچے۔

انھیں ہیلی کاپٹر سے لاپتہ کوہ پیماؤں کے آخری معلوم مقام سے ایک ہزار میٹر نیچے اتارا گیا جہاں چار رکنی ٹیم کے دو ارکان جاروسلا اور تومالا نے کیمپ لگایا جبکہ ڈینس اور ایڈم نے رات کی تاریکی میں پہاڑ پر چڑھ کر الزبتھ اور ٹوماس کی تلاش شروع کی۔

یہ ٹیم رات بھر کی کوشش کے بعد الزبتھ کو زندہ تلاش کرنے میں کامیاب رہی۔

کوہ پیماؤں کی ٹیم نے اتوار کی علی صبح اپنے فیس بک کے صفحے پر اعلان کیا کہ الزبتھ کو تلاش کر لیا گیا ہے تاہم ٹوماس ابھی تک لاپتہ ہیں۔

ٹوماس، الزبتھ سے الگ ہو گئے تھے۔اس سے پہلے موصول ہونے والی اطلاعات میں کہا گیا تھا کہ ٹوماس شدید سردی سے جلد کی تکلیف اور برف کے اندھے پن میں مبتلا ہیں۔

لوڈویک نے فیس بک پر لکھا ' بد قسمتی سے ٹوماس کو بچانا نا ممکن ہے۔'

انھوں نے مزید لکھا 'خراب موسم اور بلندی کی وجہ سے جان بچانے والوں کی زندگی بھی خطرے میں پڑ جائے گی۔'

انھوں نے کہا 'یہ بہت خوفناک اور تکلیف دہ فیصلہ تھا۔ ہم بہت صدمے میں ہیں۔ ہمارے خیالات ٹومامس کے خاندان اور دوستوں کے ساتھ ہیں۔ ہم رو رہے ہیں۔'

الزبتھ کے ایک دوست لوڈویک کا جو ان کے ساتھ مسلسل رابطے میں تھے، کہنا تھا کہ کوہ پیما کھلی ہوا میں ایک یا دو گھنٹے آرام کریں گے جس کے بعد وہ الزبتھ کے ہمراہ پہاڑ سے اترنا شروع کریں گے۔

امید کی جا رہی ہے کہ زندہ بچ جانے والے پانچ کوہ پیماؤں کو اتوار کی رات سکردو سے ہیلی کاپٹر کے ذریعے نکالا جائے گا۔